台語詩-夢中koh sio見

 夢中koh sio見

思念ê夢

敢koh會轉來

轉來故鄉kah我相見

 

阿公阿媽

我tng-leh思念lín

Lín 佇天頂敢會思念我

 

我知影

化作鳥隻kap尾蝶仔ê lín

會koh轉來看阮

 

咱佇夢中

佇夢中koh sio見

台語短篇小說-三叔阿龍

(序)

彼暗，我的船沉落底，烏暗的形影koh浮佇我的眼前，我無法度形容彼暗予我偌大的烏影…

 

彼冬陣逐家無閒tshih-tshih，過年逐家攏真歡喜，欲來過這个千禧年，予家己食飽飽，錢嘛趁飽飽。

「阿春，你共我提桌頂的菜蔬來予我煮，阿媽這頓一定愛予lín食腥燥(tshenn-tshau)啦!」

 

「多謝阿媽，看著阿媽煮的菜，桌頂菜色hiah濟，我看會當食3工ah!讚啦!」

「多謝你啦!看逐家愛食，我koh較辛苦就有價值ah!」阿媽煮甲真歡喜。

 

「阿爸，阿母，阿叔，阿嬸，大伯，阿姑，來食飯ah!阿媽煮好勢ah!」

「讚啦!讚啦!來sut落!」阿爸kap大伯喝甲足大聲!

「奇怪!三叔太會猶未轉來食飯?伊是會去tó-uī?」我發覺毋著呢!

「緊來敲予三叔ah!毋知伊會去tó-uī呢?」這馬已經是暗時七點ah!

「Giang! Giang! Giang!」「喂?請問你是?」「你好!我是屏東醫護病院的護士，請丁三龍的家屬聽電話，多謝!勞力!」

 

阿媽，是病院敲來的~

「喂?你好!我是伊的阿母，張美麗，請問阮後生是按怎?」阿媽講甲真著急。

 

「阿姨你好!我是急診室的護士，lín後生予貨車挵著，愛家屬簽緊急急救書，請你過來病院一逝，多謝!」

彼暗，阮攏無食飯等三叔的消息，逐家攏面憂憂，頭犁犁，毋敢講啥。一个過年氣氛攏無去--ah!

 

「護士小姐你好!醫生你好!阮後生是按怎?」

「伊予一台貨車挵著，出車禍, 挵著頭殼破空，真害，sńg-tn̄g著腦神經，愛緊急開刀，請你佇chia簽名，勞力! 」

 

「好!好!好!」阿媽緊簽落，手咧tshuah，心咧疼，伊毋敢相信講一个做老師个後生會予一台貨車挵甲按呢!阿媽隨吼出來。

會記得，阿媽彼暝攏睏未落，暗頓嘛食未落，心像針咧ui。

 

過6點鐘，三叔予人sak出來，規个包甲絚絚，昏迷不醒，醫生講:「伊變成植物人ah!可能一世人攏未醒過來! Lín愛有心理準備喔!」「我的阿龍，我的阿龍，呔會變做按呢!」警察大人敢有法度共歹人掠去!

 

原來三叔伊佇學校beh轉來阿媽兜个路lih，予一台超速个送貨運將挵著。

 

電話來--ah!「Giang! Giang! Giang!你好!我chia是內埔派出所，請問你敢是丁三龍的家屬?」

「著!著!我是伊的阿母，張美麗，警察大人，敢有掠著挵著我後生的歹人?」

「有!有查著!已經掠來派出所質問ah!請你放心!」警察請阿媽放心落去。

 

「我的後生阿龍，可憐的阿龍!」阿媽的目屎一直tin--落來。吼未煞。

「阿母，阮規傢伙ah聽著阿龍予人挵甲按呢，心內真毋甘，願主耶穌會當賜福予伊。」

 

「著!咱愛為伊祈禱!向望早日會當醒過來才著!」這時，逐家佇大廳，阿爸，阿母，阿叔，阿嬸，大伯，阿姑攏為三叔祈禱!

一個月了，我蓋成佇夢中，夢著三叔佇我細漢的時陣chhōa我去田岸邊耍。

 

佇夢lih，阿叔講:「我beh離開ah!天使來ah! Lín莫koh掛慮!」

「三叔，你莫離開阮! 莫離開阮!阮足愛你的!」

「多謝lín的愛，毋koh我時間已經到ah!失禮!」

 

「阿叔!~~~~~~~~~~~~~~~~~~~~」

「我知影阿叔已經離開阮ah!毋過阮愛堅強!」

 

阿媽參加三叔阿龍的基督葬禮時，雄雄昏去，可能阿媽心臟無好，伊無法度接受阿叔予主chhōa轉去的事實。

我心內想:「三叔，祝你一路好行!」我嘛哭甲目屎流目屎滴!

-----------------------------------------------------------------------------------------------------------

-(煞)-

*刊tī海翁台語文學雜誌NO.289(2026/1月)

台語詩-運轉方向

 人生 袂kham-tit ê 跋倒

倒tī街仔路 ê 思考

人生ê折磨

是m̄是運轉hăn-tó͘-luh 愛轉踅

彎彎曲曲

行袂出去ê路

射入目睭內ê譀鏡

欲án-chóaⁿ 走出

人生ê走馬燈

 

是歡喜 也是傷悲

咱án-chóaⁿ 吞忍

無法度消化ê反力量

聲聲句句ê答應

換來踏入無底ê烏洞     

       

*刊登tī台文戰線NO.81(2026/1月)

台語歌-雨水恰恰 白話字註解/高嘉徽

 窗外雨水滴滴答答 伴奏輕鬆快樂的歌聲

Thang-gōa hō͘-chúi tih-tih tah-tah phōaⁿ-chàu khin-sang khoài-lo̍k ê koa-siaⁿ

你若歡喜我才有笑聲 一字一句唱予你聽

Lí nā hoaⁿ-hí góa chiah ū chhiò-siaⁿ  chi̍t jī chi̍t kù chhiùⁿ hō͘ lí thiaⁿ

窗外雨水訴阮心聲 滴滴答答講出你知影

Thang-gōa hō͘-chúi sò͘ gún sim-siaⁿ  tih-tih tah-tah kóng chhut lí chai-iáⁿ

恰恰情歌寫給你來聽 愛的情歌唱袂煞

Chhiah-chhiah chêng-koa siá hō͘ lí lâi thiaⁿ  ài ê chêng-koa chhiùⁿ bōe soah

風的聲是吉他聲 你永遠是阮心肝

Hong ê siaⁿ sī gih-tah siaⁿ  lí éng-oán sī goán sim-koaⁿ

聲聲句句希望你知影 愛的路有你有我

Siaⁿ-siaⁿ-kù-kù hi-bāng lí chai-iáⁿ  ài ê lō͘ ū lí ū góa

咱牽手做陣行 希望佮你永遠黏相倚

Lán khan-chhiú chòe-tīn kiâⁿ  hi-bāng kah lí éng-oán liâm sio-óa

這首歌唱予你聽 月娘也知影 你永遠是阮的心聲

Chit siú koa chhiùⁿ hō͘ lí thiaⁿ  goe̍h-niû iā chai-iáⁿ 

lí éng-oán sī goán ê sim-siaⁿ

台語詩-月光

黯淡 ê 歌聲
乘載月娘
低低吟唱 ê 喉聲
 
月娘 ê 光
照入皺phé-phé ê 玻璃門
變形ê面
已經無法度hôe-ho̍k原形
欺騙chhìm入心肝底
艱苦tī光內徘迴
 
 
 

 
 
 
 
*刊tī海翁台語文學雜誌NO.283(2025/7月)

台語詩-故鄉ê記號

 故鄉ê記號

是我ê喘氣

 

你對我ê情愛

化作

一個忍者對變身ê愛

 

你敢是

Koh掛tī遠遠ê天邊

 

無聲無soah

偷我ê心思去

提我ê筆紙走

 

予我心驚惶

毋知beh走去tó-ūi bih

 

*刊tī台文罔報NO.374(2025/5月)

電子出版ê分享 高嘉徽 老師

   這馬因為攏較時行電子冊，所以我tō想kóng會當chhut看覓，我第1本ê電子冊是台語認證中高級kap寫作講義，算是教科書ê冊，針對台語認證寫ê冊，這本算賣了bōe䆀，有賣100本，chit本是2022/2出版ê。一般來講，電子出版ê價數平均起來會比紙本ê冊較低，以我來講，我家己設計封面，排版，校對，所以按呢價數會比有其他需求ê人較低，我是chhōe秀威出版社出版--ê，台語中高級寫作講義費用差不多是一萬四，毋過nā-sī有需要校對hām排版ê人，價數可能tō愛3~4萬kho͘。這算是自費出版，só͘-tì你出版ê內容是m̄-bián審查--ê，只要你橐袋仔有夠深，tō會當chhōe𪜶出版喔!

  另外一本是台語小說集，我無其他ê需求，1萬kho͘以內tō會當解決。校對hām排版是上liáu時間--ê，só͘-tì一般來講，𪜶ê收費是1.5萬~2萬左右。因為這是文學作品，𪜶講文學作品ê收費會較低，nā-sī教科類ê會較貴，別間我無chih-chiap過，若有需要mā會當加問加比較chiah bōe食虧。