若是講著我ê個性，別人會講，我是chi̍t-ê chin tiām-chēng ê 查某gín-á。我本身ê個性tō 較閉思，佮意比我大漢ê人交陪kap chò 朋友。講也怪奇，細漢ê我lóng bô-siáⁿ ài 講話，siōng ài 讀冊、去學校ê圖書館看chheh，感覺按呢chiâⁿ 好，對我來講chin sù-sī neh!
M̄-koh tō-sī 我siuⁿ tiām，同學ē kā 我chia̍h-chheⁿ-kha、欺負我，ta̍k-kái hō͘ 人欺負，我lóng bih tī 便所流目屎。
我問天:「我抑無chò 歹代誌，sī-án-chóaⁿ ài 受chia ê 苦？」我chū國校5年hông 欺負kàu 高中，我ta̍k-kang 去學校lóng khó͘-koe 面，chhiò bōe 出來。
所有ê苦我lóng吞落腹肚內，我iōng 讀冊ê分數證明我ka-tī，iōng
bûn-chiong 寫出我ê心聲，所致我會曉寫bûn-chiong tō-sī ùi細漢tō開始。
M̄-koán án-chóaⁿ，chia ê
代誌lóng-sī 往事--ah!
Chit-má ê 我 chin 快樂，出社會了後，我chhōe-tio̍h ka-tī siūⁿ-beh
chò ê 代誌。我bat 看過chi̍t pún chheh，伊講tiām-chēng tō-sī chit 種siōng-hó ê 力量。
這句話講了真好，我kā 時間開tī 讀冊、寫作kap教冊。Che tō-sī 我 beh ài ê
生活方式。In-ūi tiām-chēng，hō͘ 我有時間chò
ài chò ê 代誌；in-ūi tiām-chēng，hō͘ 我有時間準備教冊ê內容；in-ūi
tiām-chēng，hō͘ 我ē-tàng tī ka-tī ê 房間內面寫作。我ê夢想tō-sī beh 成做按呢ê人，我mā
達成--ah!Tng-tong 我有ka-tī ê 時間 chò 佮意chò ê 代時，我是siōng樂暢kap hoaⁿ-hí--ê!
To-siā 我 ê 爸母無hō͘
我sok-pa̍k，hō͘ 我自由ê空間，hō͘ 我ē-tàng 發揮。
Chit-má ê 我，ē-tàng 講是過了siōng chán ê 時陣，it-ti̍t 感謝阮tau
ê 人無放棄個性閉思ê我，hō͘ 我足chē 力量ē-sái 向前kiâⁿ！我ē koh ūi 我 ê 台語夢kè-sio̍k 拍拚！
