會記得我細漢的時，阮阿爸攏會𤆬規家伙仔去屏東揣阿公kap阿媽，雖罔阮無蹛佇屏東，毋過有當時仔阿爸會𤆬我去三合院去𨑨迌。轉去屏東ê時陣，阿公攏會攢好料ê食物予逐个食。阮孫仔輩ê攏真佮意阿公攢ê好食物，因為屏東ê好料通人知，有豬跤、ta麵、煙腸、麵線糊等等ê料理，這馬想起來就欲流喙瀾，有夠芳ê，到今我閣會懷念遮ê食物。
閣有兩層印象上深ê代誌，第一件就是有一改入去舊厝三合院ê時，看著阮祖先ê相片感覺真特別，有阿祖kap太祖ê相，我ùi 遮ê相片熟似咱ê祖先，閣有舊厝嘛予我有進前佇這个所在有細漢ê記持。我有看著舊舊ê灶跤，蓋成看著古早人煮食ê方式，炕番薯、烘餅，彼款干焦佇臺語台ê電視知影ê物件呈現佇目睭前，感覺閣較接近咱祖先生活ê記持，我足歡喜有這種古早味ê厝，親像一幅媠圖仝款。
另外一項代誌，是我讀大學ê時，kah阿爸這爿ê親戚做伙佇遮過年，阮大漢阿姑辦腥臊予逐个食，每一个人攏予阿姑飼kah飽tong-tong，足讚ê滋味，予人實在真數念佇遮逐个做伙食飯、奕牌仔，閣有tè點數臆數字，這馬因為叔伯兄弟姊妹攏大漢矣，較無咧鬥陣過年。
我三合院ê記持一直停留佇遮，我真感謝祖先𤆬領逐个做伙數念這ê有人情味ê舊厝。
