頭pái的台文筆會大會 創作日期:2020/03/07

 Ē-kì-tit kū-nî ê 8 goe̍h khì chham-ka A-jîn lāu-su ê káng-chō. Góa sī hoaⁿ-hí kah tòng-bōe-tiâu, hā-khò tō hām lāu-su la-thian, kóng kúi kù-á ōe, kóng góa siuⁿ beh ka-ji̍p Tâi-bûn pit-hōe.

Tī 10--goe̍h ê sî, góa tō piàn-chiâⁿ chèng-sek ê hōe-oân ah! Si̍t-chāi ū-kàu thiòng-ê, ē-tàng ka-ji̍p tùi ū teh siá Tâi-bûn ê góa sī chi̍t chióng khún-tēng neh!

Kàu kin-nî ê 1 goe̍h-hūn, góa chham-ka Tâi-bûn pit-hōe ê hōe-oân tāi-hōe, sim-lāi ū kàu kín-tiuⁿ mā ū kî-thāi, chêng-mê khùn lóng bōe--khì, it-ti̍t teh siuⁿ chit kiāⁿ hoaⁿ-hí-tāi.

 

Khì chham-ka ê tông-ji̍t, góa chái-khì 8 tiám gōa tō chē hóe-chhia khì Tâi-lâm ê Sêng-kong Tâi-ha̍k ê Tâi-bûn-hē kàu-sek. Góa kàu ê sî, iáu chin chá, Chiúⁿ kàu-siū tō kiò góa tàu-sang-kang, góa tō ìn hó, tō tī kūi-tâi tàu pun mi̍h-kiāⁿ.

Beh khai-sí chìn-chêng, A-jîn lāu-su chhōa góa se̍k-sāi ta̍k-ê sian-pái, góa ta̍k-ê lóng kā chheng-ho͘ lāu-su. Án-ne tō bô m̄-tio̍h. Góa teh siuⁿ, ta̍k-ê chiân-pòe lóng-sī góa ài ha̍k-si̍p ê tùi-siōng.

Khui-hōe ê sî, thiaⁿ-tio̍h chiok chē chiân-pòe ê pò-kò kap siau-sit. Ah góa mā ū khì tâi-téng hun-hióng góa siá ê Tâi-gí si. Si-miâ sī”Sú-bêng chiân-pòe chhiáⁿ lí ûn-ûn-á kiâⁿ”, ū lāu-su kóng i thiaⁿ liáu chiok kám-tōng--ê. Án-ne góa siá liáu tō ū kè-ta̍t ah! Kàu beh tàu ê sî, Pit-hōe chhoân sú-sih hō͘ lán chia̍h, si̍t-chāi chiok chán--ê! Góa kám-kak Tâi-bûn pit-hōe sī chi̍t ê un-loán ê tōa ka-têng!

初戀ê滋味 日期:20171008

 Góa beh kóng ê kò͘-sū, sī tī góa tha̍k kok-tiong ê sî-chūn kah-ì ê lâng, jî-chhiáⁿ tuì-siòng m̄-sī tông-o̍h, sī tsi̍t ê seⁿ-chò chiâⁿ súi ê lāu-su.

 

  Góa hit ê sî-chūn kan-taⁿ sī chi̍t ê cha-po͘-gín-á niā niā, m̄-chai loân-ài ê chū-bī sī siáⁿ-mi̍h, m̄-koh ū tang-sî-á ài-tio̍h chi̍t ê bô èng-kai ài ê lâng, chit chióng chu-bī chin-chiàⁿ bô siáⁿ hó, lín lâi thiaⁿ khòaⁿ-māi góa loân-ài ê kò͘-su--o͘h!

  Ē kì-tit tú-á seng kok-tiong 1 nî ê sî, kà góan Eng-gí ê lāu-su, i siōng tē 1 chiat khò ê sî, góa khòaⁿ-tio̍h--i, ba̍k-chiu siám-sih khì--lâi , kî-si̍t m̄-sī kan-taⁿ góa niâ, pat ê tong-o̍h mā it-tit khòaⁿ--i. Tī hit ê sî-chūn, góa tō kah-ì tō i--ah!

 

仙人ê生死之戀 創作日期:2017/09/14

 

Tī chit-ê sian-kài ū hun 4, 5 ê chok-kûn, in ū chi̍t ê thóng-tī ê kun-hông kiò Kong-chhun, i sī chit-ê sian-kài pōe-hūn siōng koân--ê.

  I kap i ê ài-jîn ē ū siáⁿ-mi̍h hoat-tián--neh? Lán khòaⁿ--lo̍h-khì tō bô m̄-tio̍h!

   Ū chi̍t-kái, chit-ê Kong-chhun sèng-siōng i gō͘-hōe i ê ài-jîn chò pháiⁿ-tāi-chì. Kā lâng o͘-pe̍h bú-lōa--ê, sī sèng-siōng ê hui, miâ hō-chò Lē-lē. I sī chi̍t-ê chiok hiông-sí ê cha-bó͘-lâng, siūⁿ chiok-che pān-hoat beh hāi-sí hit-ê sèng-siong ê ài-jîn A-sò͘.

In-ūi i tit-bōe-tio̍h sèng-siōng ê ài, só͘-í chiah beh hām-hāi A-sò͘.

 

拍拚ê散赤人 創作日期:2017/08/16

  Chū sè-hàn, i ê jîn-seng tō chiok pi-chhám--ê, in-ūi tī i cha̍p kuí hòe ê sî-chūn, i ê a-bú tō kòe-sin--ah! Tī kok-sió 6 nî i tō chhut-lâi thàn-chîⁿ, chin-chiàⁿ hō͘ lâng thiaⁿ liáu ū kàu m̄-kam--ê.

 

  In tau tû liáu i, koh ū chi̍t ê pí i sè-hàn 7 hòe ê sió-tī, i chū sè-hàn tō ài thó-thàn hō͘ sió-tī chia̍h kap chhēng. Sui-bóng ji̍t-chí kòe liáu chin kan-khó͘, m̄-koh i mā sī kian-chhî beh hō͘ i ê chhin-lâng kòe siōng-hó ê seng-oa̍h. Kiaⁿ sió-tī bô thang chia̍h-pn̄g, siáⁿ-mi̍h tāi-chì lóng sī i teh hoa̍t-lo̍h, i ê sió-tī lóng khòaⁿ chāi gán-lāi, i tō chin-chhiūⁿ chi̍t ê niû-lé kâng-khoán teh chiàu-kò sió-tī.

 

去舊學校行踏 創作日期:20200215

我輕輕仔行入去進前tòa ê舊學校

伊óa山 ê 邊仔

今年已經滿百歲

我若行若看風景

聽著風咻咻叫ê聲

樹葉仔ta̍uh-ta̍uh-á 飄落來

風吹ê聲若像飛行機飛過ê聲

清脆koh好聽

 

我行入去運動埕看著青lìn-lìn ê草埔

Gín-á tī hia耍tī hia行踏

熟識--ê koh會hām我相招問

雖罔已經無tī chia教冊

In koh會記得我

有夠感心

Chia 所有美麗ê景kap回憶

我永遠khǹg tī心肝底

*刊tī台文戰線NO.60(2020/10月)

高嘉徽(Ko Ka-hui)個人台語資歷

 

經歷:

1.     201708~ 投稿台文通訊罔報(文章陸續刊登出來)

2.     2017年指導內惟台語朗讀競賽(學生:204邱品綺得到第一名 301:盧碩穎得到第三名)

3.     20180527 2018全國奧林匹克台語白話字文史競賽第四名，第五屆查字典比賽第三名

4.20180623 枝枝勇於實踐台語文章分享會

5.2018春季成大全國台語認證中高級

6.2018 屏東縣本土語支援教師合格

7. 2019 擔任107年度下學期七賢國中台語社團老師