初戀ê滋味 日期:20171008

 Góa beh kóng ê kò͘-sū, sī tī góa tha̍k kok-tiong ê sî-chūn kah-ì ê lâng, jî-chhiáⁿ tuì-siòng m̄-sī tông-o̍h, sī tsi̍t ê seⁿ-chò chiâⁿ súi ê lāu-su.

 

  Góa hit ê sî-chūn kan-taⁿ sī chi̍t ê cha-po͘-gín-á niā niā, m̄-chai loân-ài ê chū-bī sī siáⁿ-mi̍h, m̄-koh ū tang-sî-á ài-tio̍h chi̍t ê bô èng-kai ài ê lâng, chit chióng chu-bī chin-chiàⁿ bô siáⁿ hó, lín lâi thiaⁿ khòaⁿ-māi góa loân-ài ê kò͘-su--o͘h!

  Ē kì-tit tú-á seng kok-tiong 1 nî ê sî, kà góan Eng-gí ê lāu-su, i siōng tē 1 chiat khò ê sî, góa khòaⁿ-tio̍h--i, ba̍k-chiu siám-sih khì--lâi , kî-si̍t m̄-sī kan-taⁿ góa niâ, pat ê tong-o̍h mā it-tit khòaⁿ--i. Tī hit ê sî-chūn, góa tō kah-ì tō i--ah!

 

  Ta̍k-kài siōng-khò, góa lóng m̄-chai i teh siōng siáⁿ-mi̍h, kan-taⁿ chai-iáⁿ i bí-lē ê hêng-iáⁿ, góa tǹg--khì chhù--ni̍h, A-bú kóng góa sī án-chóaⁿ--ah? lóng m̄-káⁿ kóng, in-ūi ài-tio̍h lāu-su sī chi̍t kiāⁿ kiàn-siàu-tāi, kan-taⁿ ta̍k-kang sim-lāi teh siūⁿ--i. Khai-ha̍k mā beh 4、5 kò goe̍h--ah, guá lóng bô hām lāu-su kóng kuè ōe, m̄-chai tang-sî ē-tàng kóng--tio̍h.

  Ē kì-tit , tī 1 nî téng ha̍k-kî beh kiat-sok ê sî, i kiò góa ê miâ-A-se, góa siūⁿ kóng góa sī khó-chhì khó bô hó--o͘h? Ah bô lāu-su thài-ē kiò--góa? I kiò góa khì pan-kong-sek kóng-ōe, án-ne góa koh khah kín-tiuⁿ--ah!

 

  “Lâi, A-se chiáⁿ chē!” Lāu-su ná kóng ná chhiò. Góa chit ê sî-chūn soah kín-tiuⁿ--khì-lâi--ah, kóng：“Lāu-su, lí chhōe góa ū siáⁿ-mi̍h tāi-chìt--ah?”

Lāu-su kóng：“Bô--lah, lí m̄-bián hiah-nī kín-tiuⁿ, góa sī beh kā lí kóng chi̍t ê hó siau-sit!”

 

  A-se sa-lóng-bô, kòng：“Ah sī siáⁿ-mi̍h hó-khang--ê?”

Lāu-su kā kóng：“Lí Eng-gí bōe-bái--neh! Chi̍t ha̍k-kî lí khó choân pan tē 3 miâ, lí m̄-chai--o͘h?”

 

  A-se si̍t-chai m-káⁿ siōng-sìn i ê hīⁿ-á, in-ūi siōng-khò bô siáⁿ-mi̍h thiaⁿ, lóng teh gông-sîn, khòaⁿ lāu-su tī o͘-pang siá lâi siá khì--niâ, khó-chhì mā iōng pòaⁿ ioh--ê, siáⁿ chai-iáⁿ ē tit-tio̍h tē 3--neh!

  A-se kā lāu-su seh to-siā, m̄-káⁿ khòaⁿ lāu-su ê ba̍k-chiu, in-ūi i ê ba̍k-chiu tōa-lúi koh súi.

  A-se chai-iáⁿ liáu-āu, tǹg-khì chhù kā A-bú kóng, in bú-á kóng：“A-se, lí sī chhut-ūn--ah--o͘h! Siōng Eng-gí khò teh sê-sîn koh ē-tàng hông o-ló, lí mā chin gâu--neh!”

 

  Chit siaⁿ A-se hoaⁿ-hí kah khùn bōe--khì--ah! I tī hia siūⁿ lāu-su ê chhiò-iông, i chin-chiàⁿ sī tit beh tòng-bōe-tiāu--ah--lah!     Āu-ji̍t koh beh siōng-tio̍h i ê khò, guá beh phō-tio̍h án-chóaⁿ ê sim-chêng kìⁿ--i! Ah! Soah soah khì--ah! Mài siūⁿ hiah chē--ah! Bîn-á-chài koh beh siōng-khò--ê, kín-khùn.

  Kiat-kó tong-ji̍t, bô khòaⁿ-tio̍h lāu-su, in-ūi thiaⁿ-kóng i phòa-pēⁿ--ah!

 

“Ah! Khó-liân ê lāu-su, góa sim-ài ê lāu-su. ”Góa ê chhùi tī hiah se̍h-se̍h-liām, ho͘ i ê hó-pêng-iú A-hiàn thiaⁿ--tio̍h.

“Eh! Lí ê lāu-su, i khó-lêng bōe koh lâi ha̍k-hāu--ah!”A-hiàn kóng liáu chin pi-siong.

  A-se chin tōa-siaⁿ teh kóng：“Uī-siáⁿ-mi̍h, lāu-su i sī án-chóaⁿ-- ah? Lí kám ē-tàng kóng hō͘ góa thiaⁿ?”」

A-hiàn kóng：“Hó, góa kóng, lí mài siūⁿ kiaⁿ-hiâⁿ, lí seng léng-chēng--lo̍h--lâi!”

A-se iōng beh 10 hun-cheng ê sî-kan chiah tiānn--lo̍h--lâi.

 

A-hiàn thó͘ chi̍t kháu tōa khuì kóng：“Lāu-su tio̍h ê sī iu-ut-chèng, chit-má tī pēⁿ-īⁿ teh chò tī-liâu, chhian-bān bōe-tàng kā i kiáu-jiáu, ah bô i ê pēⁿ ē koh khah giâm-tiōng, che sī lán chit pan ê Hôa-gí lāu-su kóng--ê, ta̍k ê lóng chin koan-sim lāu-su ê chōng-hóng.”

 

“Siáⁿ-mi̍h! Án-ne chí-hó kî-tó lāu-su ē-tàng pêng-an sūn-sū, bô-tāi-chì, chí-sī góa chiām-sî bô-hoat-tō͘ khòaⁿ-tio̍h--i--ah! Ah! Kóng-tio̍h tō siong-sim, m̄-koh lāu-su thài-ē hiông-hiông án-ne? Kám ē sī in-ūi siáⁿ-mi̍h tāi-chì--neh?”A-se sī kiông beh háu--chhut-lâi--ah!

I chiok hī-bāng lāu-su ē-tàng khah kín hó--khì-lâi--ê!

Ji̍t-chí chi̍t kang koh chi̍t kang kòe--khì--ah, i bô-hoat-tō͘ kā lāu-su pàng bōe kì-tit, tī kuí kang chêng, i koh bāng-tio̍h lāu-su chin hoaⁿ-hí lâi kā-khòaⁿ, koh hām i ū-kóng-ū-chhiò--neh!

 

  “Lāu-su góa it-tēng ē kā lí kî-tó, ǹg-bāng lí ē-tàng koh tǹg-lâi khòaⁿ gún koh thiaⁿ-tio̍h lí ê khò!”A-se ê sim chiok tîm-tāng--ê, i m̄ chai-iáⁿ jōa-kú khah ē kìⁿ-tio̍h sim-ài ê lāu-su.

 

  Hioh-kuânn ê koh kòe--khì-ah!

  Sin ê  tsi̍t ha̍k-kî khai-sí--ah!

  M̄-koh góa ta̍k kang sī iu-thâu-kat-bīn, hoaⁿ-hí bōe--khì--lâi!

 

  “Hó--ah--lah! Mài koh siūⁿ--i--ah! Lán khì phah-kiû hó--bô?”A-hiàn chhiò-chhiò teh kóng.

“Góa bô lí hiah-êng--lah! Beh khì siá kong-khò--ah! Ū-êng khah hām lí khì chhit-thô!”Góa kā A-hiàn kóng.

“Hó--lah! Tō tán lí ê sim-chêng khah hó--ê, chiah lâi chhōe góa--o͘h!”A-hiàn chi̍t ê khó͘-koe-bīn.

 

Chū hit kang A-hiàn kā lāu-su ê tāi-chì kóng liáu, i án-chóaⁿ tō lóng hoaⁿ-hí bōe--khì--lâi, in-ūi i chin-chiàⁿ chiok siūⁿ lāu-su--ê, i nā siūⁿ-tio̍h lāu-su ê chhiò-iông, i ê sim tō kiat kui-kiû.

Ū chi̍t kang hioh-khùn ji̍t, ū chi̍t thōng tiān-ōe khà--lâi, sī A-bú chiap--ê, tiān-ōe hit pêng kóng：“Kám ē-tàng kiò A-se chiap--neh?”

A-bú hoah A-se kóng：“Eh! A-se, chit thong tiān-ōe beh chhōe lí--ê, lí lâi chiap--lah!”

 

Góa bô-lám-bô-ne lâi thiaⁿ tiān-ōe, góa thiaⁿ-tio̍h  tiān-ōe ê siáⁿ sī se̍k-sāi--ê, kui ê lâng lóng chêng-sîn--khì-lâi--ah! “A-se, góa sī Ngô͘ lāu-su, lí ê Eng-gí lāu-su, lí kám ē kì-tit góa?”Góa thiaⁿ-tio̍h Ngô͘ lāu-su ê siaⁿ, ìn kóng：“Góa tong-liân mā ē kì-tit lí--ah!”Góa kóng liáu chiok sim-sng--ê.

 

  Ngô͘ lāu-su kè-sio̍k kóng：“Lí chòe-kīn hó--bô ? Góa koh teh hioh-khùn--leh! Khó-lêng koh ài 2、3 tang mā bô it-tēng--o͘h! Lí kong-khò ài ka-iû, góa ē kì-tit lí khe̍h kòe tē 3 miâ--neh! Lāu-su khà chit thong tiān-ōe sī beh kā lí ka-iû--ê, chài-hōe--o͘!”

Guá m̄-káⁿ siong-sìn lāu-su ē khà tiān-ōe, koh kā guá ka-iû, góa kám-kak bōe-tàng koh án-ne lo̍h-khì--ah!

Ài hó-hó-á phah-piàⁿ chiah tio̍h!

Sui-bóng āu--lâi bô koh kìⁿ-tio̍h Ngô͘ lāu-su--ah, m̄-koh kú kú chi̍t kài koh ē chiap-tio̍h tiān-ōe, góa mā bô koh siūⁿ hiah chē--ah!

 

Chū lāu-su khà hit thong tiān-ōe liáu, góa tō choan-sim tha̍k-chheh, kok-tiong chhut-gia̍p koh the̍h-tio̍h choân-hāu tē 3  miâ, chin-chiàⁿ chiok chán--ê, m̄-koh góa mā khòaⁿ-khui--ah! Ū lāu-su ê kó͘-lē chiah ū chit-má ê góa! Chi̍t chióng chho͘-loân ê chu-bī si̍t-chāi chin te̍k-pia̍t!

 

 

我 beh 講 ê 故事，是 tī 我讀國中 ê sî-chūn 佮意 ê 人，而且對象 m̄-sī 同學，是一 ê 生做 chiâⁿ súi ê 老師。

 

  我彼 ê sî-chūn kan-taⁿ 是一 ê cha-po͘-gín-á niā niā，毋知戀愛 ê 滋味是啥物， m̄-koh 有 tang-sî-á 愛著一 ê 無應該愛 ê 人，這種滋味真正無啥好，lín 來聽看 māi 我初戀ê 故事o͘h!

  Ē-kì-tit tú-á 升國中 1 年 ê 時，教 goán 英文 ê 老師，伊上第 1 節課 ê 時，我看著伊， ba̍k-chiu siám-sih khì--lâi，其實 m̄-sī kan-taⁿ 我 nâi，pat ê 同學 mā it-tit 看 -- 伊。 Tī 彼 ê sî-chūn，我就佮意著伊--ah!

 

  Ta̍k-kài 上課，我 lóng 無知伊 teh 上啥物，kan-taⁿ 知影伊美麗 ê hêng-iáⁿ，我 tǹg--khì 厝 ni̍h，阿母講我是按怎--ah? lóng m̄-káⁿ 講，因為愛著老師是一 kiāⁿ 見笑代，kan-taⁿ 逐工心內 teh 想伊。開學 mā beh 4、5 kò 月--ah，我 lóng 無 hām 老師講過話，毋知當時會當講 -- 著。

  Ē-kì-tit，tī 1 年頂學期beh 結束 ê 時，伊叫我 ê 名阿西，我想講我是考試考無好--o͘h? Ah 無老師 thài-ē 叫我? 伊叫我去辦公室講話，按呢我 koh 較緊張--ah!

 

  「來!阿西請坐。」 老師 ná 講 ná 笑。我這 ê sî-chūn soah 緊張 -- 去 --來 ah，講:「老師，你chhōe 我有啥物代誌--ah?」

老師講：「無--lah!你毋免hiah-nī緊張，我是beh kā你講一ê好消息!」

 

  我 sa-lóng-bô，講：「Ah是啥物hó-khang--ê?」

老師 kā 講:「你英語buē-bái--neh!這學期你考全班第三名，你毋知--o͘h?」

 

  我實在 m̄-káⁿ 相信我 ê 耳仔，因為上課無啥物teh聽，lóng teh gông-sîn，看老師 tī o͘-pang 寫來寫去 niâ，考試 mā 用半 ioh--ê，啥知影會得到第3名--neh!

  我 kā 老師 seh 多謝，m̄-káⁿ 看老師 ê ba̍k-chiu，因為伊 ê ba̍k-chiu大粒 koh súi。

  我知影 liáu-āu，tǹg-khì 厝 kā 阿母講，in 母-á 講：「阿西，你是出運--ah--o͘h!上英文課teh sê-sîn koh 會當hông o-ló，你mā真guâ--neh!」

 

  這聲歡喜 kah 睏 bōe -- 去--ah!我 tī hia 想老師 ê 笑容，我真正是 tit beh tòng-bōe-tiâu--ah lah! 後日 koh beh 上伊 ê 課，我 beh抱著按怎 ê 心情見伊! Ah! Suah suah 去--ah! Mài 想 hiah 濟--ah! 明仔載在 koh beh 上課 --ê，緊睏!

  結果 tong-ji̍t，無看著老師，因為聽講伊 phuà-pēⁿ--ah!

 

「Ah! 可憐 ê 老師，我心愛 ê 老師。」我 ê 喙 tī hiah se̍h-se̍h-liām，hō͘ 伊 ê 好朋友阿憲聽 -- 著。

「Eh! 你 ê 老師，你可能bōe koh 來學校 --ah!」阿憲講了真悲傷。

  我真大聲 teh 講：「為啥物？老師伊是按怎--ah?」 你敢會當講 hō͘ 我聽?」

阿憲講：「好，我講，你mài傷kiaⁿ-hiâⁿ，你先冷靜落 -- 來!」

我用 beh 10 分鐘 ê sî-kan 才 tiāⁿ 落 -- 來。

 

阿憲吐一口大氣，講：「老師著 ê是憂鬱症，這馬tī 病院 teh做治療，千萬bōe-tàng kā 伊kiáu-jiáu，ah無伊ê病會koh較嚴重，這是咱這班 ê 老師講 --ê，逐ê lóng真關心老師的chōng-hóng！」

 

「啥物! 按呢只好祈禱老師會當平安sūn-sū，無代誌，只是我 chiām-sî 沒法度看著伊--ah! Ah! 講著就傷心， m̄-koh 老師 thài-ē hiông-hiông 按呢? 敢會是因為啥物代誌--neh?我是 kiông beh háu-- 出 - 來--ah!」

我足希望老師會當較緊好 --起 - 來 --ê!

日子一工 koh 一工過 -- 去--ah，我無法度 kā 老師 pàng buē kì-tit，tī 幾工前，我koh 夢著老師真歡喜來 kā我 看， koh hām 我有講有笑--neh!

 

「老師我一定會 kā 你祈禱，ǹg-bāng 你會當koh 轉來看gún koh 聽著你 ê 課!」我 ê 心足 tîm-tāng--ê，我m̄ 知影 juā-kú 較 ē 見著心愛 ê 老師。

 

Hioh-kôaⁿ ê 日子 koh 過 -- 去--ah!新 ê 這學期開始--ah!

M̄-koh 我逐工是 iu-thâu-kat-bīn，歡喜 bōe 去 -- 來!

「好 --á lah! Mài koh 想伊--ah!咱去拍球好 -- 無?」阿憲笑笑teh講。 「我無你 hiah 閒--lah! Beh 去寫功課--ah! 有閒較 hām 你去 chhit-thô!」我 kā 阿憲講。

「好--lah! 就等你 ê 心情較好 --leh，才來 chhōe 我--o͘h!」阿憲一 ê khó͘-koe-bīn.

 

Chū 彼工阿憲 kā 老師 ê 代誌講了，我按怎就 lóng 歡喜 bōe--khì --來，因為我真正足想老師 --ê，我 nā 想著老師 ê 笑容，我 ê 心就 kiat kui-kiû.

有一工 hioh-khùn 日，有一通電話 khà--lâi，是阿母接 --ê，電話彼 pêng 講：「敢會當叫阿西接--neh?」

阿母 hoah 我講：「Eh!阿西，這通電話beh chhōe 你 --ê，你來接--lah!」

 

我 bô-lám-bô-ne 來聽電話，我聽著電話 ê 聲是熟識--ê，kui ê 人 lóng 精神 -- 起 - 來--ah! 「阿西，我是吳老師，你 ê 英文老師，你敢ē-kì-tit 我？」我聽著吳老師 ê 聲， ìn 講：「我當然mā ē kì-tit 你--ah!」我講了足心酸 --ê。

 

  吳老師繼續講：「你最近好 -- 無?我koh teh hioh-khùn--leh!可能 koh 愛 2、3 冬 mā 無一定 --o͘h! 你功課愛加油，我ē kì-tit 你 khe̍h 過第 3 名--neh! 老師 khà 這通電話是 beh kā 你加油 --ê，再會--o͘h!」

我 m̄-káⁿ 相信老師會 khà 電話，koh kā 我加油，我感覺 bōe-tàng koh 按呢 -- 落 - 去--ah!

愛好好仔 phah-piàⁿ 才著!

Sui-bóng āu--lâi無 koh 見著吳老師--ah，m̄-koh 久久 chi̍t kài koh 會接著電話，我 mā 無 koh 想 hiah 濟--ah!

 

Chū 老師 khà 彼通電話了，我就專心讀冊，國中chhut-gia̍p koh the̍h-tio̍h 全班第 3 名，真正足讚 --ê，m̄-koh 我 mā 看開--ah! 有老師 ê 鼓勵才有這馬 ê 我!這種初戀 ê 滋味實在真特別!我會永遠 khǹg tī 心肝 íⁿ-á 內底!!

 

 

 

 

 

*刊tī海翁文學雜誌NO.227期(2020/11月)