陪我看日出(淚光閃閃)台語改編版 高嘉徽老師

 雨的喘氣 是轉去的路程

路頂有我逐你的跤步

舊的相片 保存昨昏的溫度

你攬我 親像溫暖的大樹

雨落了 行好路 這句話我記牢

風大嘛歕(pûn)袂(buē)走祝福

雨落了 就有路就像咧(teh)看日出

你牽我 通(thàng)過雺(bông)霧

叫我看希望就佇(tī)黑暗的盡處

NASA太空人 創作日期:2021/01/10

我自細漢就真kah-ì 看科學類 ê chheh， m̄-koán 是動物--ê 抑是外星球 ê chheh 我 lóng 真愛讀。

 今仔日 beh 講--ê，是有關外星 ê 代誌。自我國中就讀著地球人登入月球 téng，koh 有收集月娘 ê 石頭來做實驗， 看有外星人 ê 存在無。

 

 地球人對外星是足 hòⁿ-hiân--ê，第1 ê 登陸月娘 ê 是美國人，tī hit-ê 年代，chit 種代誌是稀罕--ê，NASA ê 太空人替人類完成夢想。

  

 我讀高中一年仔 ê 時，有想 beh 大漢了去美國NASA ê 中心去看māi。

  彼時gín-á-tioh ê 我真正是足想beh 去 NASA--ê。

  M̄-koh 這馬 ê 我看彼時 ê 我，實在有夠天真，he m̄-sī hiah-nī 簡單 ê 代誌。

  Koh 有 chi̍t ê 較 hàm ê 代，就是我有 bat想過去 NASA 做太空人 ê 想法，實在有夠好笑--ê。

 

 Sui-bóng 大漢了無實現， m̄-koh 學會曉台文，來記錄gín-á 時代對科學 ê 期待，嘛是 chi̍t 層真特別 ê 代誌。

 

  向望我家己 koh 寫出無 kâng-khoán 自然主題 ê 文章--o͘h!

白話字版

  Góa chū sè-hàn tō chin kah-ì khòaⁿ kho-ha̍k lūi ê chheh, m̄-koán sī tōng-bu̍t--ê ia̍h-sī gōa-chhiⁿ kiû ê chheh góa lóng chin ài tha̍k.

 Kin-á-ji̍t beh kóng--ê, sī iú-koan gōa-chhiⁿ ê tāi-chì. Chū góa kok-tiong tō tha̍k-tio̍h tē-kiû lâng teng-lo̍k goe̍h-niû téng, koh ū siu-chi̍p goe̍h-niû ê chio̍h-thâu lâi chò si̍t-giām, khòaⁿ ū gōa-chhiⁿ lâng ê chhûn-chāi bô.

 

 Tē-kiû lâng tùi gōa-chhiⁿ sī chiok hòⁿ-hiân--ê, tē 1 ê teng-lo̍k goe̍h-niû ê sī Bí-kok lâng, tī hit-ê nî-tāi, chit chióng tāi-chì sī hi-hán--ê, NASA ê thài-khong jîn thè jîn-lūi oân-sêng bāng-sióng.

 

  Góa tha̍k ko-tiong it nî ê sî, ū siūⁿ beh tōa-hàn liáu khì Bí-kok NASA ê tiong-sim khì khòaⁿ-māi.

  Hit-sî gín-á-tioh ê góa chin-chiàⁿ sī chiok siūⁿ beh khì NASA--ê.

  M̄-koh chit-má ê góa khòaⁿ hit-sî ê góa, si̍t-chāi ū-kàu thian-chin, he m̄-sī hiah-nī kán-tan ê tāi-chì.

  Koh ū chi̍t ê khah hàm ê tāi, tō-sī góa ū bat siuⁿ-kòe khì NASA chò thài-khong jîn ê siūⁿ-hoat, si̍t-chāi ū-kàu hó-chhiò--ê.

 

 Sui-bóng tōa-hàn liáu bô si̍t-hiān, m̄-koh o̍h ē-hiáu Tâi-bûn, lâi kì-lo̍k gín-á sî-tāi tùi kho-ha̍k ê kî-thāi, mā-sī chi̍t chân chin te̍k-pia̍t ê tāi-chì.

 

  Ǹg-bāng góa ka-tī ē-tàng koh siá-chhut bô kâng-khoán chū-jiân chú-tê ê bûn-chiuⁿ--o͘h!

台語詩兩首(天頂ê彼粒星☪️/心內話)

 天頂ê彼粒星    創作日期:2023/04/05

我是天頂ê彼粒星  上燦爛的星

伊講我擋bōe條光燄燄ê日光

干焦想欲去烏暗ê世界

離開這个傷心地

走出銀河系

佮千萬光年遠ê星相拄

教堂(Kàu-tn̂g)

 我chū細漢ê信仰m̄-sī基督教，m̄-koh感覺chiâⁿ佮意教堂，雖罔真莊嚴，是講看起來koh媠媠ah，足佮意按呢ê建築。我是佇大學1年ê後學期chiah受洗禮，chiah進入基督ê國度來，chit pak 圖是我今年(2023.5)畫--ê，ǹg-bāng 會當有koh-khah chē人來接受按呢ê福音。

阿母的白頭chang 創作日期:2020/09/28

 有chi̍t 工，我 hiông-hiông 看著阿母 ê 白頭chang，本來無 hiah chē，這馬變較chē。我 khòaⁿ--tio̍h，心肝頭 soah 酸酸。

阿爸kap 阿母自細漢就共阮惜命命，共我 kap 阮小妹chhiâⁿ-ióng 大漢真無簡單。

 

俗語講：「天下父母心!」 佗 chi̍t位父母bōe 疼家己 ê gín-á。我細漢 ê 時，阿母就為我 ê 身體健康 chhau-sim kap kòa-gāi，煩惱東煩惱西，我活到 taⁿ 嘛beh 30歲--ah。

阿母伊講無要求回報，會當看著阮平安大漢就好。阿母，我會好好仔有孝--lí，莫koh hō͘ 你煩惱。

阿母雖罔有白頭chang，m̄-koh 猶原是我心中上 súi ê 阿母，你嘛是我人生中 第一名 ê 老師。

全羅版

Ū  chi̍t kang, góa hiông-hiông khòaⁿ-tio̍h A-bú ê pe̍h-thâu-chang, pún-lâi bô hiah chē, chit-má piàn khah chē. Góa khòaⁿ--tio̍h, sim-koan-thâu soah sng-sng.

A-pah kap A-bú chū sè-hàn tō kā gún sioh-miā-miā, kā góa kap gún sió-mōe chhiâⁿ-ióng tōa-hàn chin bô kan-tan.

 

Sio̍k-gí kóng, thian-hā pē-bú sim, tó chi̍t ūi pē-bú bōe thiàⁿ ka-tī ê gín-á. Góa sè-hàn ê sî, A-bú tō ūi góa ê sin-thé kiān-khong chhau-sim kap kòa-gāi, hoân-ló tang hoân-ló sai, góa oa̍h kàu taⁿ mā beh 30 hòe--ah.

A-bú i kóng bô iau-kiû hôe-pò, ē-tàng khòaⁿ-tio̍h gún pêng-an tōa-hàn tō hó. A-bú, góa ē hó-hó-á iú-hàu--lí, mài koh hō͘ lí hoân-ló.

A-bú sui-bóng ū pe̍h-thâu-chang, m̄-koh iû-oân sī góa sim-bo̍k tiong siōng súi ê A-bú, lí mā sī góa jîn-seng tiong ê tē it miâ ê lāu-su.

 

 

*刊tī台文罔報NO.355(2023/10月)

雲ê珍珠 創作日期:2023/03/03

雲ê目屎

是天賜ê珍珠

珍珠ê殼藏tī海沙埔

是天使tòa ê 所在

 

咱人看袂著

只有天真ê囡仔才會看著in ê 尾溜

泅去大海內底

*刊tī台文戰線NO.72

音樂kap料理 創作日期:2022/05/05

Chi̍t-ê chi̍t-ê ê 音符

Chhin-chhiūⁿ iáu-bōe 煮好 ê 料理

Tng-tong 作曲家kā 曲寫了

Phong-phài ê 料理mā好--ah！

 

我teh想

鋼琴家kah總舖師sio-kāng

好聽ê歌曲kap煮食ê物件平重要

歌聽soah

Chheⁿ-chhau koh 芳kòng-kòng ê 飯菜上桌

Tō 會siâⁿlâng lâi chia̍h lo̍h!!

出版tī台語詩集-我ê跤印lāi-té

圖片來源:https://www.gq.com.tw/article/blu-koi