Ka-hui ê 葡萄園

2024年8月31日星期六

離開人世間

我死去了

看著耶穌chhōa我走

無掛慮無牽掛

敢會當化做一隻鳥仔

飛來飛去

自由自在

會當去無去過的所在

是我

做仙了

上好ê tháu-pàng

2024年8月19日星期一

嘉徽是一个真有企圖ê少年人。按怎講--leh？伊2016年6--月開始o̍h臺語讀寫，hit冬年底tsiah開始創作，寫序ê tsit-tsūn to未曾未5冬--leh，伊已經寫超過100篇--ah；伊投稿發表、參加文學比賽，koh伊本身mā去學校做臺語老師，目今，伊beh出冊--ah，而且是家己揣出版社，家己開錢beh出版，uì tsia-ê代誌，咱就看會出來講伊是jua̋-nī-á想beh tī臺語文tsit个領域，hōo逐家看見伊ê拍拚。

嘉徽自本m̄是文學院出業--ê，進前mā m̄-bat經過系統tik ê寫作訓練，伊teh寫作是uì伊個人ê生活kap身軀邊ê觀察出發，內容真素樸，咱thang講，tsit本文學集uân-nā紀錄伊tī文學寫作頂kuân成長ê路站。伊uì生活、細漢ê記持、興趣tiok-tshiú，就親像真濟作家，tī作品內底寫著往過ê經驗kap人生ê起落，尤其tī嘉徽ê短篇小說〈A-pa ê Sim-guān〉內底，咱koh-khah清楚看著嘉徽ê心情kap伊有jua̋-nī-á長志。

Tsîng-kàu-tann嘉徽也寫幾若冬--looh，沓沓仔，伊寫--ê，無koh kan-tann限定tī伊做囡仔到大漢ê日常經驗，開始有古早ê場景（〈君皇ê生死之戀〉），有奇幻ê書寫（〈仙人ê生死之戀〉），小說ê手路也聊聊仔開始會曉變竅，無lóng取直線、按時間teh tshui-pâi--ah（譬論〈歡喜鬥陣〉、〈少女情懷〉）；故事起khiàn ê法度也開始會曉變化（親像〈虛華世界〉、〈阿蓮失蹤記〉），人講tsia̍p寫就會liú-lia̍h，有影to tio̍h。

希望嘉徽ê拍拚，ē-tàng tsiânn-tsò咱臺灣少年人ê啟蒙，m̄-nā將咱ê臺語kā講倒轉--來，mā kā寫倒轉--來，拚勢寫掠外，咱mā ài拚勢讀無仝語言ê創作，uì內底吸收營養，thang翻頭kā咱臺語文學ê園掖肥。

最後，beh kā嘉徽加油；咱逐家mā做伙加油！

2020年11月18

國立臺灣師範大學

劉承賢

清新的小品，幸福的世界

–《虛華ê世界》序言

何信翰

臺中教育大學台灣語文學系副教授

嘉徽是一位有才情的台語文新星，人看起來真有氣質。除了寫作，伊的鋼琴嘛彈了袂䆀。初初熟識的人會感覺伊恬恬，接觸久就會發現伊的積極和活力。嘉徽踏入台語界的時間其實無算長，總是因為伊的拚勢和文學底蒂，已經會當出版台語短篇小說作品集囉。

佇這本作品集內面，看會出來嘉徽的認真kah拍拚：這本《虛華ê世界》，看會出來是用來練筆的，寫的攏是親人和朋友。雖罔講是練筆，嘛看會出來作者對身軀邊的人的用心和關心。

學台文無幾年的人，欲會當用全台文寫出完整的情節，已經是真無簡單的代誌，佇這本冊的小說作品，看會出嘉徽的台語使用漸漸成熟，文筆嘛有真大的進步。散文小說透濫的風格，甜蜜的結局，表現出作者對生活的感受和對未來生活的向望。

「文如其人」，佇咧讀這本冊的過程，讀者應該攏會當感受著彼種清新、純真，對周圍真心關懷的氛圍。向望作者繼續拍拚，寫出閣較濟精采的作品，為台文創作持續加添活水。

序Ko Ka-hui高嘉徽《虛華ê世界──台語短篇小說集》

Lán kan-na ē-tàng the̍h真心來交換

Teng Hongtin丁鳳珍 2022.11.30

Jîn-seng bōe-tit oân-boán, sè-sū oh-tit chiâu-chn̂g. Che sī Hongtin tiāⁿ-tiāⁿ kóng ê ōe, nî-hòe lú tōa tiō lú koàn-sì kóng. Lán-lâng ê sìⁿ-miā, khùi-la̍t, châi-chêng chham kim-chîⁿ lóng ū chīn-pōng ê sî, bōe-tàng hoān-sū lóng chiàu sim-goān. Tiō sǹg sī phēng pa̍t-lâng koh-khah kut-la̍t phah-piàⁿ, mā-sī bô khó-lêng sū-sū hāng-hāng lóng ē-tàng tit-tio̍h ài beh ū ê hôe-èng. Che tiō sī chin-si̍t ê jîn-seng. Nā-sī tì-kak chit khoán ê sū-si̍t, lán-lâng tiō ē-tàng oa̍h kah chū-iû chū-chāi, in-ūi lán chai-bat sìⁿ-miā ê chin-siòng, lí-kái jîn-sè-kan ê si̍t-chêng.

Tiàm tī chit ê hi-hoa ê jîn-sè-kan, siūⁿ beh pó-siú sûn-chin ê lêng-hûn sī chiâⁿ bô kan-tan--ê, ài beh chiâⁿ-chòe chi̍t ê chiàⁿ-káng ê lâng, chòe chi̍t ê ū huih ū ba̍k-sái ê lâng, tiāⁿ-tio̍h ē tú-tio̍h chōe-chōe ê khó-giām. Ka-hui tiō sī ū chit khoán ì-chì ê Tâi-gí-lâng. In-ūi án-ni, Ka-hui chiâⁿ piàⁿ-sì leh cháu-chhōe ka-kī. Ka-hui chin pó-sioh che jîn-sè-kan ê chin-chêng chin-ài, iàu-ì ka-kī kiâⁿ-kòe ê kha-jiah.

Lán ùi Ka-hui ê Tâi-gí bûn-ha̍k chhòng-chok, ē-tàng chhim-chhim kám-siū tio̍h Ka-hui sī chi̍t ūi the̍h chin-sim lâi chham tho̍k-chiá kau-ōaⁿ ê chok-ka. Tiàm tī chit ê hi-hoa ê sè-kài, siōng lân-tit--ê tiō sī chin-sim si̍t-ì. Ka-hui kut-la̍t chai-pôe ka-kī, ǹg-bāng ka-kī chiâⁿ-chò gió-toh ê Tâi-bûn chheng-liân. Ka-hui mî-nōa hùn-liān ka-kī, ǹg-bāng siá chhut koh-khah súi-khùi ê Tâi-gí bûn-ha̍k, thang hō͘ lán-lâng ê sim kám-kak sio-lo̍h--khí-lâi. Che sī Hongtin beh kā Ka-hui soeh to-siā ê só͘-chāi.

2024年8月15日星期四

上帝予我 ê 禮物

我 m̄-sī自細漢 tō-sī基督徒，因為高中時期身體各樣，hō͘我真艱苦，讀大學ê時，我逐禮拜 lóng ē tńg-khì 厝，到禮拜阮爸母就ē陪我轉去學校，逐改轉去ê時 lóng ē kám-kak 真 m̄-kam。

會記--eh，我細漢就是真 tiām-chēng ê 查某囡仔， chiok 佮意去 bûn-kū行買寫作ê簿仔，到今我台文寫作 tû-li áu 用電腦拍字以外，嘛ē tiāⁿ-tiāⁿ 用筆記簿仔寫作。

所擺，我感覺寫作是神 hō͘我ê禮物，tû-liáu 神 hō͘我有教冊 ê能力以外，tō-sī寫作，sui-bóng 我中文普普 niâ，m̄-koh 寫作 chit ê 部份是我細漢到大漢 siōng 熟手 ê 能力！因為我本身體質 khah 敏感，所致我才有法度寫出 kah 別人無 kā ng-khoán ê 作品。我 koh tī 7 年前接觸 tio̍h 台文，kā我引起對母語ê感情，hō͘我寫出台語詩、散文、短篇小說，m̄-bat 我 ê 人，lóng 當做我是中文系--ê抑是台文系--ê，結果 l óng m̄-sī 讀文科--ê。

會記得有 chit̍ 擺去考成大台語認證，因為我一直 kah 阮阿爸，kah邊仔ê姊姊講台語，hō͘人當做我是台文系畢業ê學生， 2 thài-ē 講台語講 kah hiah-nī輾轉。我 kā講我 m̄-sī 本科系畢業--ê呢!我是因為愛台語 kah 為著欲 chò台語老師考認證練--ê，kah 我原本讀ê系天差地！我認為我愛好好仔傳 thòa ⁿ母語，kā母語寫作ê精神發揮出來，「喙講台語，手寫台文」，才是正港愛台灣ê台灣人啦!

2024年8月3日星期六

台語詩-思念

思念若是一隻船

敢有法度

承載我思念ê重量

浮浮沉沉

過去ê艱苦

化作無聲無說一絲一絲ê煙

*刊tī台文筆會年刊NO.11(2024年)

2024年7月21日星期日

我ê志願

我m̄-sī 無志氣，我m̄-sī無志願，我是因為身體bô-hoat-tō͘ chò-chú，só͘-pái chiah 會kah 別人kiâⁿ無kâng-khóaⁿ ê 路!

一路--nih，我拄著chiok濟貴人。Chi̍t 開始teh學台語，是陳金花老師一直kā我chhōa 路，hō͘ 我認捌臺灣字，ē-hiáu寫家己ê母語。因為chìn-chêng tō知影陳明仁老師，tī 2019 年 ê chi̍t場講座我主動kah老師講話，tō án-ne kah 阿仁老師結緣，chiâⁿ-chò 台文筆會kî-tiong ê 會員之一，我chin幸運，生 tī chit-ê 時代，拄著chiâⁿ 濟教授kā我牽教，koh kā我寫出冊ê序，hō͘我ē-tàng 實現我 ê 願望kah 夢想，tī chia chin 感謝鳳珍教授kap信翰教授。