2023嘉徽台語詩集(電子版)--我ê跤印 tī 6 月chhe欲上市！！

 老師推薦序

小女子的生命經歷 – 序嘉徽詩集《我ê跤印》

何信翰(臺中教育大學台灣語文學系副教授)

 

    嘉徽是一位chin有才情的查某囡仔，鋼琴、手工藝、文學，逐項lóng chiau會。伊也真拼勢 – 雖然身體無蓋好，總是上課、出冊、畫圖、寫作…身軀邊總是有真濟工課leh仝時進行。

    因為身體的艱苦病疼，嘉徽對文學特別投入，伊講「文字若像有一ê力量/  伊chhōa我來另外chit̍-ê世界/ Tī hit-ê世界我會當好好仔tháu-pàng我家己/ 身苦病疼暫時無--去」(〈文字的力量〉)。嘉徽對文學的意愛，對伊發表的量看會出來。伊的作品，bat刊佇《台文通訊 bóng 報》、《台文戰線》、《民報》、《教會公報》等等的文學刊物，也bat入選「 2022 戀戀曾文溪台語徵稿」的選文(伊開始寫詩到今也無幾年的時間!!)

。會當講是一位多產的詩人。

    嘉徽是一位平凡koh特別的查某囡仔。Tī chit本詩集內面，嘉徽分享伊的心情和發心beh做台語的心情；求學的過程和對時事的看法…會當講詩集內面，有伊這幾年的心路歷程。

    嘉徽和你我仝款，是一般人，所以伊的心情、伊的詩，讀者真簡單就會當tī內面對映著家己的經歷，親像這首詩：「我用鉸刀剪 tiāu 過去 ê pháiⁿ-mih̍ -á/ 我用鉸刀剪 tiāu 思戀 ê 滋味/ 我用鉸刀剪 tiāu 內心 ê 空喙/ 想欲放 bōe 記得/ 毋過 M̄-koh 就是剪 bōe tiāu 心疼 ê 感覺//」。有過類似經驗的朋友，應該lóng會當體會hit款心情。

    Tī這本詩集內面，收錄beh 70首無仝年份創作的詩作。相信若是讀者沓沓ah讀，一定會當讀出一款特別的滋味。也期待嘉徽繼續創作，寫出koh khah濟精彩的作品。

 

 

 Tâi-gí bûn chheng-chhun ê hoe-lúi！Tân, Kim Hoa 20220130

  2016 nî Ka-hui lâi siōng TLH tī Ko-su-tāi ê Gí bûn kàu-ha̍k tiong-sim só͘ khui--ê Tâi-gí lô-má-jī ki-chhó͘ tha̍k-siá khò-têng se̍k-sāi kàu-taⁿ, 2022 nî 2--goe̍h ah. Chiok chia̍p siu-tio̍h Kahui ka-kī chò lâi sàng--góa ê Tâi-gí jī chiok-hok khah-phìⁿ, koh put-kóan sî kap góa hun-hióng I ê hoaⁿ-hí iah-sī siong-pi. Che kúi tang lâi, khòaⁿ Kahui chi̍t-pō͘ chi̍t kha-ìn chiàu khí-kang kiâⁿ, mā kiâⁿ-chhut I ka-kī Tâi-gí lō͘ ê chi̍t phiàn thiⁿ. Si̍t-chāi chiok hoaⁿ-hí.

 

  Siūⁿ khí goán hō͘-siong pôe-phōaⁿ ê ji̍t-chí；Ū chin-chē lāu-su tàu-saⁿ-kāng, kā I siá ê bûn-chiuⁿ 1 phiⁿ koh 1phiⁿ siu-kái, kap I kau-thong, kā I kó͘-lē. Goán kiōng-tông hû-chhî ê lí-liām；Tin-sioh hán ū siàu-liân lâng ē-hiáu siá Tâi-gí, chhiáⁿ I tio̍h-ài chhōa-thâu, chiâⁿ-chò siàu-liân pòe Tâi-gí lāu-su, lâi phah phòa Tâi-gí sī lāu lâng ê tāi-chì ê koan-liām. Sui-jiân Ka-hui khó Tâi-gí jīn-chèng ê lō͘ pēng bô sūn-lī, beh khó kah C1 mā khó 2-3nî chiah kòe. Chóng--sī, I bô lúi-chi, kè-siok jīn-chin.

 

  M̄-nā khó kòe Choân-bîn tâi-gí jīn-chèng C1, mā thong-kòe pe̍h-ōe-jī kiám-tēng C kip. Koh khéng ta̍uh-ta̍uh-á ha̍k-sip, chiah piàn chò ū chún-chún ê Tâi bûn lâng.Che kî-kan I jīn-chin siá-chok, tâu-kó, koh ka-kī chioh Chia̍t-ūn ê Bi-lē-tó chām hia ê Ki-ki sió-chām chèng-sek pān Tâi-gí bûn ê hoat-piáu-hōe. Kám-siā chin-chē Tâi-gí chiân-pòe, iú-chì, lóng lâi chham-ka, kā kó͘-lē. Koh ū Tâi bûn chiân-pòe ê thiàⁿ-sioh, hō͘ I  chham-ka Tai-bûn pit-hōe, kè-siok chhòng-chok.

 

  Ka-hui chin-khéng ha̍k-sip, m̄-nā siá sòaⁿ-bûn, mā siá si hām siáu-soat. I kiâⁿ ka-kī--ê kè-ōe-sèng kha-pō͘. Kā só͘ siá ê bûn-chiuⁿ chún-pī beh lâi chhut-pán ah. Góa chìn hoaⁿ-hí! I kóng；Lāu-su, góa sui-jiân in-ūi sin-thé bē chò-chú, tio̍h-ài kā Tâi-gí ha̍k-hun pan ê khò thêng-tiāu, m̄-koh góa ē kian-chhî siá-chok kap jīn-chin chò Tâi-gí lāu-su. Góa ē chhut-pán….Chit-má I oân-sêng ah! Góa ê sim-koaⁿ thâu sió-lo sió-lo, chhiūⁿ pha̍k-tio̍h chhun-thiⁿ ê ji̍t-thâu. Lán tī TLH khò-têng só͘ iā--ê Tâi-gí bûn-jī hòa ê chéng-chí , tī Kahui ê sin--siōng puh-chhut Tâi bûn iù-iⁿ, koh khui-ki hoa̍t-hioh ah.

 

  Kiong-hí Kahui！kám-siā só͘-ū pôe-phōⁿ --iê lāu-su , mā chiok-hok Kahui sin-thé kiān-khong,  kè-siok lâi chèng-choh tâi-gí chit tè chhân-hn̂g, hō͘ Tâi-gí bûn chhut-thâu-thiⁿ.

 

 

 Chheng-chhun ê Koa-siaⁿ 青春ê歌聲

 

Teng Hongtin丁鳳珍 2023.5.16

Chheng-chhun ê koa-siaⁿ kun-tòe Ka-hui ê kha-jiah-āu, sûn-chin ê sim-chiâⁿ phiau-sàn tī Ka-hui ê si-chi̍p-lāi. Che sī Hongtin tha̍k chi̍t pún si-chi̍p liáu-āu ê hoat-kiàn.

Goān-ì kā ka-kī ê chin-sim chin-ì tián-hiān tī sè-kan-lâng ê ba̍k-chiu-chêng, iau-chhiáⁿ tho̍k-chiá chòe-hóe kiâⁿ ǹg si-jîn ê hoe-hn̂g. Che kî-si̍t m̄-sī hiah-nī kán-tan ê tāi-chì. Jîn-seng ê thé-hōe ná lâi ná chōe liáu-āu, Hongtin siūⁿ beh pó-siú ka-kī chi̍t ê lâng ê chhiū-nâ, bô siūⁿ beh kā in tián-hiān tī sè-kan-lâng ê bīn-thâu-chêng, ū chin chōe sim-chiâⁿ, Hongtin bô goān-ì chham sè-kan-lâng hun-hióng.

In-ūi án-ni, Ka-hui khong-khài tāi-hong iau-chhiáⁿ ta̍k-ke kiâⁿ-ji̍p i ê hoe-hn̂g, sêng-sim sêng-ì thòe iú-chì chai lo̍h chin súi ê hoe-liu, hoaⁿ-hí kā chheng-phang ê hoe-lúi sàng hō͘ ū iân ê tho̍k-chiá. Ka-hui ê jia̍t-chêng kap phah-piàⁿ hō͘ lán khim-phòe.

Chit pún si-chi̍p in-ūi án-ni, chiâⁿ-chò lán sûi-sî ē-tàng kiâⁿ ji̍p-lâi hioh-khùn, kiâⁿ ji̍p-lâi sàn-pō͘ ê só͘-chāi. Tī chit ê sûn-chin ê hoe-hn̂g, lán ē-tàng thiaⁿ-kìⁿ thiⁿ-sài ê chhiò-siaⁿ, hō͘ lán sim-hoe khui.