Sap-sap-á 雨
Sap-sap-á hō͘
輕輕滴teh我的面
Khin-khin tih teh góa ê bīn
雄雄我的面裂--開
Hiông hiông góa ê bīn lih--khui
原來是天使的珠淚
Goân-lâi sī thiⁿ-sài ê chu-lūi
伊 teh 共我牽挽
I
teh kā góa khan-bán
是主的引chhōa
Sī Chú
ê ín-chhōa
是主的祝福
Sī Chú
ê chiok-hok
*刊 tī 教會公報社No.3630(2021/9/20~9/26)
線上收聽: 天使ê淚痕
其實我是chi̍t-ê chin phah-piàⁿ ê 查某囡仔，我mā siūⁿ-beh 有家己
ê 空間kap讀khah koân ê 想法，m̄-koh 因為身體ê關係，無允准我會當kah別人kâng-khoán 會使正常khì學校讀冊。事實上，我是chi̍t-ê chin 內向ê人，感覺家己chi̍t-ê人做代誌ê感覺chiâⁿ好！
無了解我 ê 人會當做我是chi̍t-ê怪跤，iá-sī 活tī 家己ê世界內底，其實m̄-sī按呢！我chū細漢就真kah-ì tha̍k-chheh，chìn-chêng ê 文章mā有寫著我 ê 興趣chiok
chē，就是chia ê 代誌hō͘ 我人生充滿了快樂。我家己mā有真chē ê 想法，愛有一定ê
thêng-tō͘ 熟似我 ê 人chiah有hoat-tō͘ 了解我，我mā
chin 享受家己chi̍t-ê 人出去sńg，m̄-kò有當時á mā
ē hām家己khah hó
ê 朋友去食飯。
我真kah-ì iōng 寫文章ê方式來kah ta̍k-ê
交流，我mā 會用錄音講故事ê方式tī YOUTUBE chò 放送，我siūⁿ，che 就是我kah外面 ê 人交流 ê 方法。
Múi chi̍t-ê 人lóng 會有家己適合kah ta̍k-ê
分享心內話ê chi̍t 部份，我感覺，iōng台文ê方式就是上適合我 ùi 心內tháu-pàng ê phiat-pō͘。
Chiok chē 人lóng 會問我ná-ē chiah-nī kah-ì 寫文章，其實che 是ná-chhiūⁿ
我透過文字內熟似家己，重新kā 家己心內 ê 話寫出來。外向 ê 人會用kah
chiok chē 朋友開講 ê 方式來表達 in 家己 所想--ê，內向
ê 人tú-hó 倒反，kā文字當做朋友來看待。
而且上大ê好處就是siūⁿ beh tùi 伊講啥就講啥，hō͘家己發揮 ê 空間chiâⁿ 大，bōe hông sok-pa̍k。我teh siūⁿ ，文章就是我上好 ê 朋友，嘛是我上親愛
ê 人。
Ka-hui ê Podcast : 我的心內話
我tī chi̍t-ê 水池
Bo̍k-bo̍k-siû
雄雄忽然間
我看著一个會當倚靠ê岸
Khiā tī 這 ê 舞台頂
我喝講
我欲 tī chia 共咱美麗島嶼ê母語
傳承落去
阿母講
咱 bōe-tàng tàn-hìⁿ-sak咱 ê 臺灣話
伊共我chhi̍h讚
Hō͘我有自信tī台仔頂繼續發揮
Góa jîn-seng tiong ū chi̍t ê chin tiōng-iàu ê bo̍k-phiau, tō-sī tī 30 hòe chìn-chêng ē-táng tńg-khì tāi-ha̍k ê bú-hāu hun-hióng, pān chi̍t tiûⁿ
Tâi-gí ián-káng hō͘ ha̍k-tē、ha̍k-mōe thiaⁿ. Jû-kin, góa
tī téng kò goe̍h oân-sêng chit kiāⁿ tāi-chì, sim-lāi chiok hoaⁿ-hí
chiok boán-chiok--ê!
Tō tī téng kò goe̍h ê 10 hō hit kang, góa
e-chái-á siōng kok-hāu ê khò kàu 11 tiám gōa, tō kín tńg-khì chia̍h-pn̄g, hêng-lí khóaⁿ-khóaⁿ--leh, beh chē kheh-ūn khì
Si̍t-chiān tāi-ha̍k lāi-bûn hāu-khu ê kàu-sek chò chún-pī, ē kì--eh kàu ha̍k-hāu ê sî-kan
iáu-bōe 2 tiám.
Siūⁿ kóng thê-chá kàu, chò chún-pī sī hó-tāi, ián-káng sī 3 tiám chiah khai-sí.
Sui-bóng góa chìn-chêng í-keng ū pān kòe 3 tiûⁿ Tâi-bûn
hun-hióng hōe--ah, m̄-koh kóng si̍t-chāi ōe, mā-sī ke kiám-á
ē kín-tiuⁿ.
Beh khai-sí ê chìn-chêng, tī tāi-ha̍k kà góa ê só͘-ha̍k lāu-su koh
ū lâi chhōe--góa, si̍t-chāi chin thiòng!
Ián-káng chi̍t khai-sí góa
sió-khóa-á siāu-kài góa ka-tī liáu, tō khai-sí siāu-kài góa ê kàu-ha̍k kap Tâi-bûn ê hun-hióng. Siāng tiōng-iàu ê sī Tâi-gí bûn chit ê pō͘-hūn, siàu-liân-lâng khah bô liáu-kái.
Só͘-pái góa hun-hióng”Goa̍t-lâm
ché-ché hō͘ góa ê khé-hoat ”、”Siàu-liân
Tâi-gí lāu-su ê sim-siaⁿ”，koh ū 2 phiⁿ góa siá
ê té-phiⁿ siáu-soat:”A-liân sit-chong kì” kap ”Seⁿ-jîn ê seⁿ-sí chin loân”.
In-ūi sî-kan iú-hān, kò͘-sū bô-hoat-tō͘ choân-pō͘ pàng hō͘--liáu, tō kéng siōng cheng-chhái ê pō͘-hūn lâi pàng.
Góa koh kā in kóng, ài
chim-chiok thiaⁿ, ē mn̄g būn-tê sàng lé-mi̍h chhut--khì.
Thiaⁿ liáu góa tō khai-sí mn̄g būn-tê, m̄-koh
ta̍k-ê chiok pì-sù, góa tō iōng tiám--ê, ū jīn-chin thiaⁿ--ê, seng iu-sian kiò.
Góa tō kóng chīn-liōng iōng Tâi-gí kóng, án-ne chiah ē chìn-pō͘ o͘! In the̍h-tio̍h
lé-mi̍h ê sî chin-chiàⁿ ū kàu hoaⁿ-hí--neh!
Góa sàng kā chi̍t ê Tâi-gí ma-ma bé ê tah-chóa,
tah-chóa siá”Tùi góa kóng Tâi-gí”, koh ū góa kū-nî 11 goe̍h hūn ê sè-tiuⁿ hái-pò, iáu-koh ū Tâi-bûn
Bóng-pò.
Góa kā in kóng Tâi-gí ū
nn̄g chióng jī, chi̍t chióng sī Hàn-jī, chi̍t chióng sī
Lô-má-jī. Koh ū kóng-tio̍h Lô-má-jī
ê tiōng-iàu-sèng. Góa tō kóng:”Chò chi̍t ê
Hôa-gí lāu-su bōe-hiáuㄅ、ㄆ、ㄇ, kám ē-tàng chò Hôa-gí ê lāu-su?”
He sī bô khó-lêng ê tāi-chì--lah! Só͘-pái chò chi̍t ê Tâi-gí lāu-su, it-tēng ài ē-hiàng Lô-má-jī, jî-chiáⁿ í-āu nā-sī beh o̍h kî-tha kok-ka ê gí-giân, ē chin-kín tō ē-hiáu--o͘!
Kiông-tiāu Tâi-gí Lô-má-jī ê tiōng-iàu-sèng.
Ē-kì--tit teh ián-káng ê kòe-têng tiong, góa ū mn̄g
kóng lín kám-kak ē-hiáu Tâi-gí kám-ū tiōng-iàu? In chiok chē
lâng gia̍h-chhiú. Góa koh mn̄g:”Lín kám-kak ài kà lán āu chi̍t tāi Tâi-gí kám-ū chin iàu-kín?” In
koh jú chē lâng jīn-tông.
Ǹg-bāng góa iā-chí chhut-khì, chia ê
siàu-liân-lâng ē-táng thé-hōe góa ê iōng-sim.
Góa mā ū kóng Tâi-gí jīn-chèng ê soat-bêng hō͘ in thiaⁿ, ǹg-bāng koh khah chē
siàu-liân-lâng ke lâi khó.
In-ūi Tâi-gí tâi tī ku-nî 7--goe̍h khí-kó͘, kok-kagí-giân
hoat-tián hoat thong-kòe, bó-gí siū-tio̍h pó-chiong, bī-lâi bó-gí
ê khang-khòe ē
jú lâi jú- chē, mā kó͘-lē Kheh-ka kap goân-chū-bîn ê pêng-iú ē-sái kóng ka-tī ê bó-gí.
Ián-káng ê siōng-bóe góa iōng khin-sang
chhù-bī ê hong-sek kiat-sok, góa chhiùⁿ 2 tiâu góa ùi Hôa-gí koa kái-pian
chò Tâi-gí koa hō͘ ta̍k-ê thiaⁿ, chò chi̍t ê siu-bóe.
Kám-siā chú-pān tan-ūi ê iōng-sim, hō͘ góa ū ki-hoe khiā tī ha̍k-hāu ê tâi-á-téng kóng bó-gí hō͘ ta̍k-ke jīn-bat. Mā
kám-siā chia ê ha̍k-tē、ha-mōe,
to-siā、ló͘-la̍t!
伊是一个純潔的少女
I
sī chi̍t ê sûn-kiat ê
siàu-lú
溫純koh善良
Un-sûn
koh siān-liông
勇敢koh有智慧
Ióng-kám koh ū tì-hūi
綴佇教主的身軀邊真貼心
Tòe tī kàu-chú ê sin-khu pin chin tah-sim
教主毋甘伊離開
Kàu-chú m̄-kam i lī-khui
毋過波斯的船欲出帆--矣
M̄-koh
Pho-su ê chûn beh chhut-phâng--ah
教主目chiu金金看船離開
Kàu-chú ba̍k-chiu kim-kim khòaⁿ chûn lī-khui
再會啦!伊心愛的聖女
Chài-hōe lah! I sim-ài ê sèng-lú
我是 tī 5 年前，因為教會朋友ê紹介，來到高師大上金花老師ê基礎台語羅馬字班￮彼時，我iáu m̄-chai-iáⁿ 台文是啥￮是老師上課ê時，提出「台文通訊罔報」ê雜誌，kā咱分享台文親像罔報內容按呢寫，我彼ê時陣我iáu-koh bōe-hiáu寫--ê，m̄-koh因為讀罔報hō͘我台文koh-khah進步，ē-tàng得著台語ê資訊kap智識￮
Tī 2016年ê 12月，我為著beh kā台語學hō͘ 好，就開始我第一篇ê台文寫作￮一開始，我ê羅馬字足chē lóng 寫m̄-tio̍h，老師足有耐心kā我牽教，hō͘ 我沓沓仔對寫台文有信心￮
Tī我ê拍拚之下，我ê第2篇全羅ê散文hō͘ 罔報刊出來，刊tī 2017年ê 8月份￮這時，我足感謝台文通訊罔報hō͘我chi̍t-ê寫台文ê新人有機會刊登，而且彼時ê編輯koh有hō͘ 我寫作ê建議，hō͘ 我 ê 台文koh-khah 進步￮
到今，已經過5冬--ah，我因為老師ê鼓勵koh teh 寫，目前罔報已經刊我十幾篇ê文章￮我真感謝罔報!陪我讀5冬ê台語，嘛經歷我考過中高級做台語老師ê時間￮
Tī這个te̍k-pia̍t ê 日子，30週年 ê
日子，我beh 祝福台文通訊罔報ē-tàng發行久長，chi̍t-ê
ē-tàng 行過30年日子ê台文雜誌，實在無簡單!祝福台文通訊罔報30週年快樂!
親愛主耶穌
親愛主耶穌
下早仔來親近你
阮的艱苦kap心內話
攏會共你講
親愛主耶穌
親愛主耶穌
我向你祈禱
向望咱攏平安喜樂
心愛的救主
Chhin-ài Chú iâ-so͘
Chhin-ài Chú iâ-so͘
Lí sī gún ê kiù-chú
Ē-chái-á lâi chin-kīn lí
Gún ê kan-khó͘ kap sim-lāi
ōe
Lóng ē kā lí kóng
Chhin-ài Chú iâ-so͘
Chhin-ài Chú iâ-so͘
Góa hiòng lí kî-tó
Ǹg-bāng lán lóng pêng-an
hí-lo̍k
Sim-ài ê kiù-chú
親愛主耶穌
親愛主耶穌
下早仔來親近你
阮的艱苦kap心內話
攏會共你講
親愛主耶穌
親愛主耶穌
我向你祈禱
向望咱攏平安喜樂
心愛的救主
Chhin-ài Chú iâ-so͘
Chhin-ài Chú iâ-so͘
Lí sī gún ê kiù-chú
Ē-chái-á lâi chin-kīn lí
Gún ê kan-khó͘ kap sim-lāi
ōe
Lóng ē kā lí kóng
Chhin-ài Chú iâ-so͘
Chhin-ài Chú iâ-so͘
Góa hiòng lí kî-tó
Ǹg-bāng lán lóng pêng-an
hí-lo̍k
Sim-ài ê kiù-chú
