教堂(Kàu-tn̂g)

 我chū細漢ê信仰m̄-sī基督教，m̄-koh感覺chiâⁿ佮意教堂，雖罔真莊嚴，是講看起來koh媠媠ah，足佮意按呢ê建築。我是佇大學1年ê後學期chiah受洗禮，chiah進入基督ê國度來，chit pak 圖是我今年(2023.5)畫--ê，ǹg-bāng 會當有koh-khah chē人來接受按呢ê福音。

阿母的白頭chang 創作日期:2020/09/28

 有chi̍t 工，我 hiông-hiông 看著阿母 ê 白頭chang，本來無 hiah chē，這馬變較chē。我 khòaⁿ--tio̍h，心肝頭 soah 酸酸。

阿爸kap 阿母自細漢就共阮惜命命，共我 kap 阮小妹chhiâⁿ-ióng 大漢真無簡單。

 

俗語講：「天下父母心!」 佗 chi̍t位父母bōe 疼家己 ê gín-á。我細漢 ê 時，阿母就為我 ê 身體健康 chhau-sim kap kòa-gāi，煩惱東煩惱西，我活到 taⁿ 嘛beh 30歲--ah。

阿母伊講無要求回報，會當看著阮平安大漢就好。阿母，我會好好仔有孝--lí，莫koh hō͘ 你煩惱。

阿母雖罔有白頭chang，m̄-koh 猶原是我心中上 súi ê 阿母，你嘛是我人生中 第一名 ê 老師。

全羅版

Ū  chi̍t kang, góa hiông-hiông khòaⁿ-tio̍h A-bú ê pe̍h-thâu-chang, pún-lâi bô hiah chē, chit-má piàn khah chē. Góa khòaⁿ--tio̍h, sim-koan-thâu soah sng-sng.

A-pah kap A-bú chū sè-hàn tō kā gún sioh-miā-miā, kā góa kap gún sió-mōe chhiâⁿ-ióng tōa-hàn chin bô kan-tan.

 

Sio̍k-gí kóng, thian-hā pē-bú sim, tó chi̍t ūi pē-bú bōe thiàⁿ ka-tī ê gín-á. Góa sè-hàn ê sî, A-bú tō ūi góa ê sin-thé kiān-khong chhau-sim kap kòa-gāi, hoân-ló tang hoân-ló sai, góa oa̍h kàu taⁿ mā beh 30 hòe--ah.

A-bú i kóng bô iau-kiû hôe-pò, ē-tàng khòaⁿ-tio̍h gún pêng-an tōa-hàn tō hó. A-bú, góa ē hó-hó-á iú-hàu--lí, mài koh hō͘ lí hoân-ló.

A-bú sui-bóng ū pe̍h-thâu-chang, m̄-koh iû-oân sī góa sim-bo̍k tiong siōng súi ê A-bú, lí mā sī góa jîn-seng tiong ê tē it miâ ê lāu-su.

 

 

*刊tī台文罔報NO.355(2023/10月)

雲ê珍珠 創作日期:2023/03/03

雲ê目屎

是天賜ê珍珠

珍珠ê殼藏tī海沙埔

是天使tòa ê 所在

 

咱人看袂著

只有天真ê囡仔才會看著in ê 尾溜

泅去大海內底

*刊tī台文戰線NO.72

音樂kap料理 創作日期:2022/05/05

Chi̍t-ê chi̍t-ê ê 音符

Chhin-chhiūⁿ iáu-bōe 煮好 ê 料理

Tng-tong 作曲家kā 曲寫了

Phong-phài ê 料理mā好--ah！

 

我teh想

鋼琴家kah總舖師sio-kāng

好聽ê歌曲kap煮食ê物件平重要

歌聽soah

Chheⁿ-chhau koh 芳kòng-kòng ê 飯菜上桌

Tō 會siâⁿlâng lâi chia̍h lo̍h!!

出版tī台語詩集-我ê跤印lāi-té

圖片來源:https://www.gq.com.tw/article/blu-koi

鄧紫棋 紅薔薇白玫瑰(一段歌詞翻做台語，有Pe̍h-ōe-jī)

 鄧紫棋 紅薔薇白玫瑰其中一段歌詞翻做台語

 

月亮會一直帶領 往幸福的路徑

月娘一直會kā咱𤆬領 往幸福ê道路

Goe̍h-niû ē it-ti̍t kā lán chhōa-niá óng hēng-hok ê tō-lō͘

月亮也聽見你說 說你會一直愛我

月娘嘛捌聽你講 講你一直會愛我

Goe̍h-niû mā bat thiaⁿ lí kóng   kóng lí it-ti̍t ē ài góa

夢裡鮮紅的薔薇 睜眼是蒼白的玫瑰

夢內底紅紅紅ê薔薇 開目是白蔥蔥ê玫瑰

Bāng lāi-té âng-âng-âng ê chhiûⁿ-ûi  khui ba̍k sī pe̍h-chhang-chhang ê mûi-kùi

它躺在月亮下 紀念著曾經最真摯的愛

伊倒tī月娘ê下跤  紀念上真ê愛

I tó tī goe̍h-niû ê ē-kha   kì-liām siōng chin ê ài

飯店ê頭路

 

會記得我大學ê時，讀ê科系是kah chit-má chò ê 頭路完全bô sio-siāng-- ê。我大學是讀觀光系ê，課程mā ē-tàng 算chheⁿ-chhau。語言方面ê課有日語、英語、法語、韓語，彼時大學一年it-tēng ài siu 日語，觀光英語mā-sī 必修ê課，m̄-koh hit-tang-chūn 我身體bô kài 好，請假去看醫生算chin 四常ê代誌。

 

  我承認tī 1、2 nî ê 時bô 啥jīn-chin，ài 去社團chhit-thô。我tī seng 3 nî hit冬想講bōe-tàng koh án-ne 落去ah！Tō piàⁿ-sè kā 英語kap 飯店有關ê課好好仔o̍h。到4 nî beh kàu飯店實習，我想講ài 表現hō͘ 好，bōe-tàng chhut-chhôe。正常來講，ài 實習2kò goe̍h，chi̍t kò goe̍h kan-taⁿ 有8000 kho͘ ê 薪水，m̄-koh put-koán 有錢ia̍h-sī bô 錢，學校kap飯店合作hō͘ 學生ki-hōe，tō 算chiâⁿ 好ah！所pái對bô社會經驗來kóng ê 我，真正chiok 緊張--ê。第一工去上班我thàu-chá 5tiám gōa tō ài 起床chò 準備。我ài 7 tiám 以前 tō kàu 飯店，服務業就是ài 提早足chē sî-kan chò 備料，beh hō͘ 人客好ê服務。

  Siūⁿ袂kàu，我chò bô chi̍t 禮拜，跤 tō 發炎受傷，soah bô hoat-tō͘ 上班，ài 請假。Tī 當時 ê 我，chiâⁿ艱苦，sī-án-chóaⁿ 別人lóng ê 堪得，我soah bōe-tàng kè-sio̍k 做。阿母伊chin 煩惱，tō 趕緊chhōa我去看骨科，醫生kóng 我ê 跤發育bô 完全，bōe-tàng chò khiā siuⁿ 久ê 工課，ah taⁿ 害ah！

 

   我ê實習bô 完成tō bōe-tàng 畢業neh!Sī beh 按怎khah 好，āu--來公司kā 我調去chò 總機我chiah 毋免chò khiā 規工ê 服務工課。M̄-koh che koh 是另外一个挑戰，我kā ka-tī kóng ài chò hō͘ 好。

 

  尾仔我有順利畢業，gún 阿母伊感覺以我ê條件去飯店上班是choa̍t-tùi bô būn-tê ê。Gún chhù ê 人 bô 死心，koh chhōa 我去chò 特殊ê鞋仔，hō͘ 我上班ê 時穿。

 

  我koh chi̍t pái 穿特殊ê鞋仔去另外chi̍t keng 五星級ê飯店chò 工課，結果第2工，跤koh發炎，in-ūi ài khiā 8 tiám-cheng，彼時我心底已經拍算，可能bô hoat-tō͘ koh chò 一途ah！其實上班第2工，我tú-tio̍h chi̍t ê 好人客，伊kóng 我服務chiâⁿ好，hō͘我200kho͘ ê 所費，我驚一tiô，m̄-káⁿ 收。因為咱臺灣ê飯店是bô teh 收人客 ê 所費，外國chiah 有án-ne，m̄-koh 我感覺án-ne chin bô 公平，照理來講，服務chò liáu 好，人客hō͘服務人員所費是chin 正常 ê 代誌。結果chò 兩工niâ，koh bōe-tàng kè-sio̍k chò--ah!我chiok 傷心，我sī-án-chóaⁿ bē-tàng kah 我ê同學kāng-khoán，ē-tàng 正常上班。

 

  M̄-koh 就是有án-ne ê 經驗，hō͘我 koh愈珍惜chit-má ē-tàng khiā tī 台頂chò 台語lāu-su ê 頭路，che 一切lóng 是Chú ê ín-chhōa！感謝Chú！

*刊tī台文戰線NO.71(2023/7月)