Chò台語指導老師bô簡單

  我雖罔chò台語老師bô kàu 5冬，m̄-koh 我做過2 kài 學校 ê 台語朗讀評審kap指導老師，mā kà 過gín-á 寫台語詩。Beh chò 台語朗讀 ê 評審需要chiok 大 ê kang-hu。

 

  第1，老師本身 ê choan-gia̍p 愛有夠，因為每chi̍t-ê 音 ê 念法、聲調lóng 愛 chin 清楚。我teh siūⁿ，che 是 chiok 基本 ê 代誌，m̄-koh 有 ê 老師平常時bô 一直講台語 ê koàn-sì，變做連講台語 ê 時，發音mā bô phiau-chún。咱chò 人 ê 台語老師，nā-sī 連家己 ê choan-gia̍p lóng bô 尊重，án-ne 是beh án-chóaⁿ kiò 別人尊存咱 ê 母語？

 

  第2，teh 指導學生比賽 ê 時，一定愛soán 本身有teh 講抑是對台語有興趣 ê 學生gín-á，因為nā-sī soán-tio̍h bô 興趣--ê，學生bô hó ê 學習態度，老師 mā ē kà liáu chin 痛苦。所擺，盡量愛soán 有心beh 練習臺灣話 ê gín-á，án-ne kà liáu chiah會khah 歡喜，mā 會 khah 有耐心kā khan-kà。

 我認為只要有用心kap耐心iōng tio̍h ê 方法 kà gín-á 台語，in tō 自然對台語有興趣、siūⁿ-beh o̍h。咱除了有熱情，koh 愛加上choan-gia̍p ê 態度，台語一定會有出頭天 ê chi̍t kang!

雙面的我 創作日期:2022/01/01

 

我發現我有雙面ê個性，ná-chhiūⁿ 日本電影死亡筆記phō͘-á內底ê sí-sîn kah thiⁿ-sài，我若是痛苦ê時，hit-ê sí-sîn tō 會chhōa 我去烏暗ê所在，講beh kā我tú--sì，我實在真kiaⁿ-hiâⁿ，kan-taⁿ會tī piⁿ-á the phi̍h-phi̍h-chhoah，m̄-chai beh 按怎。

 

 這个時陣，只有醫生ē-tàng kiù--我，我kah 伊對談ê 時，sí-sîn 就會hō͘ 人kóaⁿ 走!天使就會緊來救我。只要我願意kiâⁿ 出去，khì 樹林行行--leh，koh pha̍k-ji̍t，天使就會koh 轉來我chia。

 

  這馬hia ê iau-koài lóng bih--khí-lâi，這是值得我hoaⁿ-hí ê 代誌，經過冬外 ê 磨練，我會koh khah 堅強kap 正面，bōe koh siak lo̍h hit-ê 烏khâm-khâm ê 空。

神仙ê歌 創作日期:2021/10/23

 Tī 天頂泅水是幸福代

Tī thiⁿ-téng siû-chúi sī hēng-hok tāi

神仙落hoân啥人知

Sîn-sian lo̍h-hoân siáⁿ-lâng chai

 

到位ê時soah倒頭chai

Kàu-ūi ê sî soah tò-thâu chai

結果摔chi̍t-ê tī hia ai

Kiat-kó siak chi̍t-ê tī hia ai

 

我kā 講你是人人愛

Góa kā kóng lí sī lâng-lâng ài

你是天地ê主châi

Lí sī thiⁿ-tē ê chú-châi

上súi ê海岸聲 創作日期:2020/07/29

我來到美麗ê海岸

Góa lâi kàu bí-lē ê hái-hōaⁿ

看著黃昏夕陽親像日頭花hiah-nī iāng

Khòaⁿ-tio̍h hông-hun se̍k-iông chhin-chhiūⁿ Ji̍t-thâu-hoe hiah-nī iāng

溫柔ê海湧聲若像阿母親切 ê 笑容

Un-jiû ê hái-éng siaⁿ ná-chhiūⁿ A-bú chhiⁿ-chhiat ê chhiò-iông

 

共我引chhōa

Kā góa ín-chhōa

成做我心內悲傷 ê 安慰

Chiâⁿ-chò góa sim-lāi pi-siong ê an-ùi

Che 是我上接近上帝ê出口

Che sī góa siōng chiap-kīn Siōng-tè ê chhut-kháu

 

*刊tī 教會公報社NO.3636(2021/11/1~11/7)

鋼琴對我的重要性 創作日期:2021/09/21

 

我chū細漢就真kah-ì 音樂，不管是唱歌ia̍h-sī 演奏樂器，lóng-sī 我ê興趣。我讀國校ê時陣有參加學校ê合唱團kap phín-á 隊，mā有代表學校出去比賽，得著佳作，che 是我細漢上kiau-ngō͘ ê chi̍t 層代誌。

 

  其實，我國校ê時，爸母真疼我，lóng-ē hō͘ 我上才藝課，m̄-koán 是心算、作文ia̍h-sī電腦，我lóng-ū 認真o̍h！就是無上著鋼琴課，我感覺寫作kah電腦我lóng chiok有興趣，mā o̍h liáu chiâⁿ 好！M̄-koh 心內有一點仔遺憾，就是chiok siūⁿ-beh o̍h 鋼琴，阿爸無予我o̍h。會記得細漢ê時阿爸講o̍h鋼琴siuⁿ傷本，só͘-tì 就無hō͘ 我o̍h，我一直kā o̍h 鋼琴chit-ê夢想khǹg tī 心肝底。

 

 我上大學ê時，因為tī chi̍t改 ê ki-hōe，我kā 阮阿姨講我真siūⁿ-beh o̍h 琴，伊就 kā 阮阿母講，講我有興趣就hō͘ 我去o̍h！結果tī我19歲hit 冬，我chèng-sek khì 補習班chhōe 老師 o̍h 鋼琴，我真歡喜mā chiok骨力o̍h！

  Sui-bóng tī 學校liān-si̍p ê 時間無kài chē，m̄-koh 我真tin-sioh 我kah體育館 ê 鋼琴培養感情，有當時仔同學in講in mā siūⁿ-beh 聽我彈，我mā hō͘ in tī 邊仔聽。

 

 彈鋼琴上有成就感 ê 就是tī 我25 歲hit 冬，tī 高雄美麗島 ê chi̍t 間咖啡廳辦人生 ê 第 1 場分享ka演奏會，彈琴ē-tàng 彈kah 辦音樂會mā是我人生中上te̍k-pia̍t ê 目標，hit kang 觀眾有夠 chē，我心內真感動！鋼琴陪我度過大學時期艱苦 ê 日子，hō͘ 我真大 ê 力量，mā hō͘ 我有才調辦音樂會，伊對我來講是chi̍t-ê chiok重要 ê 好朋友。

我人生ê向望 創作日期:2021/10/11

 我ê人生向望bô kài大，就是kā台語老師chit-ê角色做hō͘ 好勢，koh有kā siūⁿ-beh 寫ê文章寫出來，發表我ê台文作品就 bô 遺憾--ah!

 

 我較早iáu-bōe接觸台文進前，做過餐廳ê服務人員，m̄-koh 因為做kah跤受傷發炎，就bô適合koh做lo̍h-khì--ah.

 

  人生ê路真長，lán 愛堅持家己só͘ 愛--ê，家己só͘ 信仰--ê，kā thn̂g湠 chit 層代誌做hō͘ 好就是我人生siōng 大ê向望!Ló͘-la̍t!

Tī 21世紀社會ê女性 創作日期:2020/11/15

   Kiat-hun sī siáⁿ? Kiat-hun ê ì-gī tī tōe？ Lán cha-bó͘-lâng kám-kóng it-tēng ài chò chit kiāⁿ tāi-chì jîn-seng chiah ē oân-boán?

 

Góa kám-kak tī chit-má ê siā-hōe, ū chiok chē cha-bó͘-gín-á bô ài kè-ang, in-ūi in jīn-ûi ka-tī ē-tàng chiàu-kò͘ ka-tī, ē-sái chhī-oa̍h ka-tī, kám-kóng tō it-tēng ài kè--lâng, ài óa-khò cha-po͘-lâng, seng-oa̍h chiah ū hoat-tō͘ kòe ē lo̍h-khì?

 

Góa ê tap-àn sī “tī 21 sè-kí ê siā-hōe, sī bô it-tēng ê tāi-chì”, cha-bó͘-lâng mā ē-tàng kah cha-po͘-lâng kāng-khoán, ē-sái ū ka-tī ê thâu-lō͘, ka-tī ê chhù, ka-tī ê châi-sán, mā-sī ē-sái kòe liáu chin hēng-hok、chin sù-sī, lán chò lú-sèng mā ē-tàng kiâⁿ-chhut ka-tī ê chi̍t phìⁿ thiⁿ--o͘h!!

漢羅版

結婚 sī siáⁿ? 結婚 ê 意義 tī tōe？咱 cha-bó͘-lâng 敢講一定 ài 做chit件代誌人生chiah ē 圓滿?

 

我感覺 tī chit-má ê 社會，有 chiok 濟 cha-bó͘-gín-á 無 ài 嫁翁，因為 in 認為 ka-tī 會當照顧ka-tī，ē-sái 飼活 ka-tī，敢講tō 一定ài kè--lâng，ài 倚靠 cha-po͘-lâng， 生活 chiah 有法度過會 lo̍h-khì。

 

我 ê 答案是「tī 21 世紀 ê 社會，是無一定 ê 代誌」， cha-bó͘-lâng 嘛 ē-tàng kah cha-po͘-lâng 仝款，ē-sái 有 ka-tī ê 頭路，ka-tī ê 厝，ka-tī ê 財產，mā-sī ē-sái 過了真幸福、真sù-sī，咱做女性 mā ē-tàng 行出 ka-tī ê chi̍t 片 thiⁿ--o͘h!!